Anti Corruption Bureau-in LADC mi 7 thubuai a siamsakte chu Gauhati High Court-in man hma-a bail-a chhuah phalna, anticipatory bail a pe. Aizawl District Court-a Special Judge, Pi Lucy Lalrinthari’n thla hlui ni 22-a LADC mite anticipatory bail dilna a hnawl hnu-ah heng mi 7-te hian a tukah Gauhati High Court, Aizawl Bench-ah anticipatory bail hi an dil zui a, an dilna hi Court chuan vawiin khan a ngaihtuah hnuah, man hma-a bail-a chhuah an dilna hi phalsak mah se, Lawngtlai Police Station OC phalna lo chuan Lawngtlai khawpui chhuahsan lo turin a ti a, Case IO hnu chhuina an tibuai tur a ni lo a, hnu chhuina atana tangkai lehkha leh thil pawimawh pawh an tichhe tur a ni lo a, Court duh dan hi an bawhchhiat chuan anticipatory bail hi titawp turin sorkar-in Court a ngen thei dawn a ni. Heng mi 7-te bail dilna ngaihtuahna-ah hian sorkar aiawhin Addl. PP, Pu AK Rokhum a ding a, mi 7-te aiawh hian an ukil, Pu LH Lianhrima leh Pu B. Lalramenga an ding a ni.
.
Puan tawh angin, LADC hnuaia zirtirtu leh thawktu dang lak chungchangah hian kum 2013 khan ACB-ah FIR thehluh a ni a, ACB-in a chhuinaah LADC CEM ni lai, Pu V. Zirsanga bakah mi dang 6 – Pu H. Lalruatkima, Pu B. Vanlalngheta, Pu Lalduna Chinzah, Pu Ramengzauva, Pu NC Muankima leh Pu C. Lalchawiliana te chu thubuai a siamsak a, Aizawl District Court-a Prevention of Corruption Act Court-ah anticipatory bail an dil a, mahse, Special Judge, Pi Lucy Lalrinthari chuan an dilna hi a hnawl a ni.