Kumin kum tira Republic Venga mi 5 thattu, Laltlanchhuaha thubuai ngaihtuahin August ni 5 Nilaini khan Court-in he tualthahna chungchang, ziaka police hnena thlentu chu thu a zawtfiah.
.
He tualthahna chungchanga police-a FIR thehluttu, Pu K. Lalhmingthanga chuan a thil hmuh leh hriatte chu Court-ah a sawi a, sorkar ukil leh Laltlanchhuaha ukil-te pawhin thu an zawt a, Pu K. Lalhmingthanga chuan zawhna chhangin Laltlanchhuaha chu Republic Veng khawtlangah a sual thu emaw, a chanchin chhe lam emaw hre tam lo mah se, tlangkama a thu hriat pakhat chu, Laltlanchhuaha hian pressure cooker ah zawhte nung lai a chhum hlum tawh ni-a an sawi thu, Court chu a hrilh a ni.
.
Court chuan Laltlanchhuaha'n pawi a khawih lai hmutu, Pu Sangliansiama te nula pawh a thu hriatte sawi tura koh leh a tum a ni.
.
Laltlanchhuaha hian kumin January ni 9 zan khan Republic Venga Pu sangliansiama te chhungkua-a mi 5 chu a that a, police-te'n man nghalin lung inah an khung a, lung inah hian Laltlanchhuaha hian a chhuah hunah mi 4 thah tur a la neih thu a hrilh niin a tanpui pa-in Court a hrilh a ni.
.
Republic Veng khawtlang chuan Laltlanchhuaha kaihhlum phut hian kumin June ni 25 khan kawng an zawh a ni.