Kumin kum tira Republic Venga mi 5 thattu, Laltlanchhuaha'n vawiin 4 august ah Court-ah heng mi 5-te hi a thah a nih loh thu a sawi.

District & Sessions Judge, Pi Lucy Lalrinthari'n Laltlanchhuaha thubuai hi Addl. District & Sessions Court-a a pek hnu ah Laltlanchhuaha hi vawiin khan Court-ah a inlan a, Judge, Pu Vanlalenmawia chuan Laltlanchhuaha an puhna chu pawmin thubuai a siam a, police-te'n amah an puhna a pawm leh pawm loh Judge-in a zawh chuan, Laltlanchhuaha chuan, mi 5-te chu a that lo ni-a sawiin, an puhna chu thu dik lo niin a sawi a, khami zan khan kha Inah khan a lut lo niin a sawi.

Judge chuan police-te'n Laltlanchhuaha thubuai an siamsak, IPC 302, tualthah thubuai leh IPC 449, thil sual tih tuma mi In luh thubuai chu a pawm a, Laltlanchhuaha hian mi 5 a thah bakah In chhunga awm ve pakhat chu thah a tum ve tho ni-a sawi a nih avangin IPC 307, tualthah tum thubuai a pek belh a, he tualthahna chungchanga police-a FIR thehluttu chu Court-a inlan turin a ko a ni.