July 31 : Africa ram zin tinuamtu leh mi te hmuh chak, tourist sang tam takin Zimbabwe ram an tlawh huai huaina chhan Sakeibaknei pa huaisen leh pa tak, bak hmul ngah chhur mai "Cicil the Lion" ti a an koh thal hmanga kaphlumtu American dentist Dr. Walter James Palmer chu khawnge a awm hre lovin, man tumin an veh hut hut.

Khawvela ramsa te chunga ngilnei leh duattute chuan Dr Palmer hi a na thei ang bera hrem an phut a, Internet lamah Cicil the Lion ui thu leh Palmer demna thuziak a tam hle. Dr. Palmer hi khawnge a bih ruk hriat a ni lova,The Safari International Club chuan a license an paihsak a, "a phu ang tawk hremna" a hmabak chu awm an tih pui.
Dr. Palmer leh a thian-guide, Theo Bronkhorst leh Honest Ndlovu te chuan Palmer hian Sa kah a duh tih hrilhin, sa kah phalna an lo siam sak a. July 1, 2015 khan sa pelin an kal a, Cicil the Lion chu chahin, zan 10 p.m ah Palmer hian thal hmangin a lo kap a, a hnu darkar 40 velah Cicil the Lion hi a thi niin an hria. A hnu chhui zuia a ruang an va hmuh hian kah phalloh tih nghawngawrh alo awrh avangin pawi an khawih tih an hre chauh niin an sawi.

Dr. Palmer's guide te hian US$ 50,000 hlawh turin Dr Palmer hi an lo hruai a, anni hian Hwange National Park-ah sa an pel pui a ni.

Theo Bronkhorst leh Honest Trymore Ndlovu te chu police in man tawhin, court ah hruai an ni a, $1000 in bail-a chhuah rih an ni. Bronkhorst hi Safari Operators Association, Zimbabwe ah member a ni a. Thiam loh chan tir anih chuan kum 15 thleng a tang thei dawn a ni. Honest erawh chu engmah case/ charge a ni ve lo. Broñkhorst chuan, "Dr. Palmer hian he lai vela sa pel a tum lova, a bungrua chu a lo thlen tlai avangin zan riakin, a tumna hmun ni lovah sa a pel ta a, Sai ngho lian tak 63 pounds nei pawh kah a duh tih min hrilh a ni," a ti.

Zimbabwe Prosecutors te chuan Dr Palmer chu US a kir tawh anih chuan, man a, Zimbabwe ah rorel sak tura thawn turin US sorkar an ngen mek. Dr. Palmer hi Minnoseta State a awm a ni a, hetianga Cicil the Lion a kahhlum avangin a dawr pawh hawng zui lovin a bi bo rih a ni. US Fish and Wildfire Service Dept chuan Dr. Palmer hi man tumin an zawng (hunt) mek a, thuneitute kuta inpe thuai turin, an ti.
Amah pantu damlo zing atang pawhin Dr Palmer dodalna kawng zawha tel an awm nual a. Thuziak an ken zingah "Tualthattu", "Kei hi Cicil ka ni", "Justice for Cicil", "Rot in Hell", "Palmer-Hremhmun mei sa in a nghak reng che", etc tih te an keng. Cicil the Lion thihna chuan khawvel pum a deng chhuak a, uitu an tam hle a ni. Zimbabwe's tourism industry pawhin a tawrh phah hle turah an ngai. Ramsa humhalh sa kaphlum/ tihlum duhtu chu na taka Dan ang ngeia hrem an phut a ni.