Nepal rama lirnghing tuarte tanpui nana Mizoram Art Development Society lemziak thawh lilam tuma huai taka chhanga lei ta si lo, John L. Hmar inti chu police-te'n an man.
Nepal rama lirnghing tuarte tanpui nana ZONET-in vehbur an khawnah Mizoram Art Development Society hian an lemziak 14 an thawh a, hei hi May ni 15 zan khan ZONET Studio atangin LIVE-a lilam a ni a, hetah hian John L. Hmar, Dimapur-a Commandant inti chuan lemziak 4 chu ₹25,000, ₹35,000, ₹7,000 leh ₹25,000-a chhangin lemziak 4 ah a chhang huai ber a, hemi bakah hian heng lemziak lilamna-a mipui chhan loh te pawh a khul tur thu, telephone atangin a sawi a, mahse, a tuk atangin biakpawh theih a ni ta lo a ni.

Hei hi thil fel lo tak, mipui zah lohna leh an thil tih hmutsitna-a ngaiin Mizoram Art Development Society chuan June ni 24 khan Aizawl Police Station ah FIR an thehlut a, police te chuan FIR hi bawhzui he thil hi an chhui nghal a, July 30 zan khan John L. Hmar inti, John Lalrempianga, kum 29, Lalbiakliana fapa, Bethlehem Vengthlang inti chu an In atangin an man a ni.
An mi man hian lemziak lilam chu a chhan loh thu leh engmah a hriat loh thu sawi mahse, police-te chuan a tih ngei a ni tih finfiahna an nei tha tawk niin an sawi a, a thubuai erawh chu bail-a chhuah theih a nih avangin vawiin tlai khan bail-in a chhuak niin an sawi.

Police-te chuan, John Lalrempianga hian kum 2012 khan mi bum leh tih luihna-a mi thil chhuh luih thubuai a nei tawh a, hemi tum hian a hming chu John Lalhrilsanga niin police-te a hrilh ni-a thu dawn a ni.
ZONET Chanchin Thar
31 July 2015