30/7/15 : Mipat hmeichhiat thilah a hmingchhiat vangin Social Welfare department chuan Davida Home, Kolasib Khuangpuilam licence a rawn cancel sak a, hetih lai hian Home enkawltu ber Zonunthari chuan naupang thenkhat chu a enkawl zui theihna turin affidavit siamin engkim a lo tifel hman.
Davida Home-a hmeichhe naupang pakhat chu Home Father Lalzoliana (40) s/o Hmingthanga chuan a khuai-khem thinah puh a nih vangin kumin May 7 khan Kolasib police te chuan an man a, district jail lamah dahluh tawh ni mahse FIR thehluhna hi Champhai PS a nih vangin Zoliana hi tun thlengin chargesheet a la ni lo.
Hemi avang hian he thubuai hi Kolasib-ah ngaihtuah anih theihnan chak zawka hma la turin Champhai police OC chu Kolasib SP C. Lalzahngoa chuan a hrilh tawh.
Tin, Zonunthari hi a unaupa pawikhawih a lo zeppui avangin a lakah thubuai siamsak a ni bawk niin thudawn a ni.
District Child Protection Officer Lallaisanga hnen atanga thu a dawn danin Davida Home atang hian naupang awm mekte pawh hruaichhuak vek tura hriattir an ni tawh a, thenkhat chu hruaichhuah tawh niin mahni chhungte bula awm zui an awm a, Home danga dah te pawh an awm bawk.
Amaherawhchu sorkarin lehkha a pek hma hian pawikhawihtu a puh Zoliana unaupa farnu, Zonunthari hian naupang engemawzat chu a kawl zui theihna turin affidavit hmangin engkim a lo tifel hmang tawh niin a sawi thung.
Davida Home hian kum April 2, 2013 khan sorkar atangin Licence (No. 33 of 2010) a nei tawh a, hemi chhung hian sorkar atanga tanpuina pawisa fai Rs. 16,45,560/- an dawng hman a, a vai hian tum thumah pektlak an ni.
Heng bakah hian thawktu dang - Superintendent,Counselor, Case Worker, House Father, Paramedical Staff, Accountant, Cook, Helper leh House keeper hlawh atan thlatin Rs. 1,13,500/- a tum sak ziah bawk a, heng thawktu zingah hian medical leh accountant tih loh thawktu dang lakah hian Home thuneihna a ni thung.
Hetianga licence tihtawp sak a nih takah chuan Integrated Child Protection Scheme kaltlanga sum an dawn bang zawng zawng leh he scheme atanga bungrua an lei zawng zawng te pawh DCPO, Kolasib hnenah hian hlan vek tura hriattir an ni a, tunkar chhungin heng bungrua te hi DCPO lam hian an la chhuak dawn niin thudawn a ni.