Central YMA Supply Reduction Service (SRS) hian April 11-July 23 chhung khan Heroin No.4 hawng 44, Can 332.5, chhin sen 37, AP Strip 436, Ganja 4.200kgs, Meth 108,800, a hlut zawng Rs 35,895,000 an man tawh a, mihring 521 manin, Home ah mi 34 an dah lut a, Excise hnenah mi 17, Police 16 pe in, Councelling pek mi 213 an nei tawh a ni.

Mipui atanga ngenna te, Nu leh pa tam tak ngenna te avang leh YMA Kumpuan ‘Ram leh Hnam humhalh’ hmalakna peng pawimawh tak pakhat a nih avangte leh kan Aizawl khawpui tihmaibaltu a nih avangtein Central YMA chuan huphurh tak chungin April 11, 2015 zing dar 5:00 atangin SRS (Supply Reduction Service) hmangin ‘RUIHHLO BEIHPUI,’ Pu J Lalsailova Treasurer, Central YMA, Convener-na hnuaiah an thawk leh ta a. Pathian hruaina zarah harsatna lian tham tawng lovin thla thum hmel a hmu leh ta der a. Police leh Excise lam hotute nen thawhhona a thain hnathawh rah pawh hmuh theihin a lang chhuak a, Central YMA chuan lawmawm a ti tak zet a ni.

Nimin July 24, 2015 (Friday) atang hian SRS chu member tharte inruatin Tv. Lalhmachhuana Asst. Secretary, Central YMA, Convener-na hnuaiah kal chho zel tura ruahmanna siam a ni. Kohhran hrang hrang, Pawl leh mimal inpete atangin SRS hnathawhna tur pawisa engemawzat dawn a ni tawh a, petute zawng zawng chungah Central YMA chuan lawmthu a sawi a ni.

Nunkawng diklo zawhte tan Mizoram Synod-in a tul tur ang sum tumin 'Chhanchhuahna Camping' August 4 - 24, 2015 chhung hian Central YMA nen Art & Culture Dept. Complex, Berawtlang-ah a buatsaih dawn a, mitin te hnenah Camping lo awm tur leh SRS hma lak zelna turah theihtawpa tawngtaina tan lo la turin kan inngen a ni.