MIZORAMIN SUM HARSATNA TAWP A TAWH LAIA SUM CHUNGCHANGA PM-IN STATE CM TE A KOHNA-A AN KAL DUHLOH AVANGIN CONGRESS CHU MIZO MIPUITE TAN THLAN NAWN CHI A NI TAWHLO"
– Zoramthanga, President, MNF

Jul 24, 2015 Mizoramin sum lama harsatna tawp a tawh laia Prime Minister-in sum chungchang State hrang hrangte harsatna sawipui tura a kohah an kal duhloh avangin Mizo mipui tan Congress chu thlan nawn leh chi a nih tawh lo, MNF President Pu Zoramthanga chuan a ti.

Pu Zoramthanga chuan, Mizoramin sum harsatna namen lo a tawk a, AMC sum nuai 1,000/- chuang an hreng a, mimal leh company-ah vaibelchhe tel an ba a, MR bill lak theih loh mai bakah thla 4/5 hlawh la thei lo tam tak an awm a. Heti anga sum lama harsatna kan tawh laia sum harsatna sawipui tura Prime Minister koha an kal duh lo hi central zungkai vai nationalism-in a control party an nih vang chauh a ni, a ti a.

MNF President chuan, “An pite’n thupek an rawn siam tawh chuan ‘Zoram tan’ tih lam a lang tawh lo a, mipuite harsatna an hre pha tawh lo,” a ti. MNF sorkar laiin, “Treasury khar a ni lo a, khar a ni lo mai ni lovin kan sum hman loh RBI-a kan dah tlingkhawm vaibelchhe 300 chuang a tling a, official te nen kan lawm nghe nghe,” a ti.

MNF sorkar laiin kum khatah plan fund vaibelchhe 525 vel chauh an neih chu ‘a chi-ah’ hmangin sum tam tak an sawi chhuak tih a sawi a. Durtlang kawngpui laihna,
Millenium Centre sakna,
Aizawl - Lunglei World Bank Road,
Ch. Chhunga bus terminal,
Ch. Saprawnga truck terminal,
New Capital Complex,
Serlui ‘B’ Hydel project
leh ram ro tling sawisen loh an din thu a sawi a.

Tunah Congress sorkar-in plan fund a hma aia a let 3 chuang vaibelchhe 1500 - 2000 chuang an nei chung pawhin sum leh paiah harsatna tawp kan tawk tih a sawi bawk a ni.

Pu Zoramthanga chuan Congress party chanchinbu Congress Thlifim-ah Pastor zu do hming chhinchhiahna tur an tichhuak a. Kan pastor-te’n an hlauh loh em avangin an thu an zuk leh a, chutah ngaihdam dil turin Congress vice president chuan Synod hotute a ko a ni, a ti.
“MNF-in ngaihdam dil tur chu ni ila hetiang thil lian thamah chuan president ngeiin ngaihdam ka dil ang, An president ber a ngawi tlat hi a mak ani, a ti bawk.

MNF President chuan Pu R Thangmawia, ZORO president Geneva-a boral ta chu a ui thu a sawi a, MNF-in zalenna a puana signatory a nih thu leh Senator hlui a nih thu sawiin, “Tlang hrang hranga Zofa thendarha awmte insuihkhawm lehna tura beitu ropui a ni a. A ruang hmuahnaah pawh MNF member-te a tam thei ang ber kal turin kan inhriattir ani,” a ti bawk.

He inkhawmah hian MNF president hian Upa Sanghlira, Jt. Registrar, Co-operative Societies (R) leh Kristian Tlangau chanchinbu, Jt. Editor bakah thalai lehkha thiam 10 (sawm) chuang, MBA 5 telin a lawmlut niin an party thuchhuak chuan a tarlang bawk.