LADC CEM, Pu V. Zirsanga leh mi 6 chu Middle School Zirtirtu leh thawktu dang lak danah thil dik tawk lo awm nia sawi chungchanga thubuai siamsak an ni a, District & Sessions Court in anticipatory bail an dilna a hnawl tak avangin, High Court ah Anticipatory bail an dil leh a ni.

LADC mi 7-te’n Court-a anticipatory bail an dil chu District & Sessions Judge-in alo hnawl tawh a. LADC hnuaia zirtirtu leh thawktu dang lak an nih dana ACB-in thubuai a siamsak –
LADC CEM- Pu V.Zirsanga,
Education Officer- Pu H. Lalruatkima,
LADC Office-a Art & Culture Dept-a thawk- Pu B. Vanlalngheta,
Lawngtlai DEO - Pu Lalduna Chinzah
Lawngtlai DEO Office-a Cashier- Pu Ramengzauva,
Lawngtlai Middle School Teachers’ Association President- Pu NC Muankima
leh Secretary- Pu C. Lalchawiliana
-te’n man hma-a bail an dilna chungchangah hian Aizawl District & Sessions Judge, Pi Lucy Lalrinthari chuan, he hna lak chungchang chhuitu-in thubuai neite hi zalèn taka an awm chuan an thil tih finfiahna tur thil pawimawhte an tihchhiat theih thu leh, thu hretu tam tak an vehthlèm ni-a a hriat thu, Court a hrilh chu thu tlingah pawmin, anticipatory bail an dilna chu a hnawl ta a ni.

Kum 2013 October thla khan Pu M. Lalrammawia, Lawngtlai khua chuan LADC-in Middle School zirtirtu leh thawktu dang a lak danah thil dik tawk lo a awm ni-a sawiin, ACB hnenah FIR a thehlut a, ACB chuan Vigilance Department-ah a thawn nghal a, mahse, Assembly inthlanpui a hnaih tawh avangin Vigilance Department chuan ACB-in Preliminary Inquiry a dil chu thla 10 lai a tihkhawtlaisak a, nikum September thla khan a chhui thar leh a ni.

FIR thehluttu, Pu M. Lalrammawia chuan, LADC-in Middle School zirtirtu leh thawktu dang a lak danah hian thil fel lo tak a awm nia sawiin, ''lak tharte hi Selection Grade-ah hlan kai nghal an ni,'' a ti a, hei hi thil fel lo lian tak ni-a a hriat avangin ACB-ah FIR a thehlut ta niin a sawi.

ACB chuan he thil a chhuina-ah hian LADC CEM, Pu V. Zirsanga leh mi 6 chu thubuai a siamsak a, District & Sessions Court in anticipatory bail an dilna a hnawl tak avang hian ACB chuan heng mi 7-te hi an man dawn niin an sawi a, Pu Lalduna Chinzah tih loh, mi dang zawng chu Lawngtlaia an awm avangin Aizawlah an ko ang a, an lo kal loh chuan a hmunah panin an man dawn niin an sawi.
Mahse heng mite zingah hian mipui thlan, Pu V. Zirsanga a tel ve avangin sorkar-ah man phalna an dil dawn niin an sawi bawk.