MZP-te chuan April 2, 2015 zing khan Aizawl veng țhenkhata hnam dang sumdawngte an enfiah a, dan loa sumdawng an hmuhte chu an dawr an khârsak nghal.
MZP tarlan danin, dan loa sumdawng an mante chu Mizo hming hawha sumdawng leh sumdawn phalna (licence) nei lote an ni a; hmun dangah pawh dan loa hnam dang sumdawngte dap chhuah hna thawh zel an tum a ni.

MZP chuan, hnam dang dan loa sumdawng an dap tih hriat vanga hnam dang dawr ni reng si, hlawh neia Mizo ruai a, anmahni dawr anga lo chhál an tam hle niin an sawi a, "Hnam dang dawr mahni ta anga lo chhâl hi hnam phatsanna a nih avangin, hnam dang dawr mahni ta anga chhâl tawh lo turin MZP chuan Mizo mipuite kan ngen a ni," an ti. Hnam dang sumdawngte an endiknaa khawtlang hruaitute tawiawmnaah lawmthu an sawi bawk.