NLUP hi Central atanga Pu Lal Thanhawla te sawi chhuah chu ni se, chapopui tham a tling mai thei, mahse mipui chanvo lak khawm mai a ni. Cabinet Committe on Economic Affairs (CCEA)-in kum tina kan sum hmuh thin pangngai ACA, SPA, CSS leh adangte pawt khawma a remtihpuina mai a nih avangin, Congress sorkar hian a thinlet nan Chhiah an ti sang ta chiam chiam a ni, MNF President Pu Zoramthanga chuan a ti.

March ni 27 zan dar 6:30pm khan Nghalchawm Community Hall Mipui vangtlang kalkhawm hmaah he thu hi a sawi a, chhiah te chu tihpun ngai a ni a. Kan sorkar lai pawhin a awm tâwk leh mi rethei zawh tawk enin kan ti sang ve tho, a ti a. ''5% te, 10% te-a chhiah tihsan hi thil nih phung a ni, 100% te ema tih san leh, a khawn theih ang ang khawn ngawt hi chu Samdala policy a ni a, NLUP an sem mipui an dilletna hmanrua liau liau a ni,'' a ti.

NLUP leh Congress sorkar fakmawi tura Pastor pakhat an sawmin, NLUP Revitalization Programme-a a thusawi duhdan chu mak a tih thu sawiin, Pu Zorama chuan, ''Speaker atana Kohhranin a rawih thin a ni a, rawih fo tlak a ni em tih, kohhran hotu te’n zirchiangin a Video en ve ngei se, ka duh kher mai,'' a ti a. Sorkarna a tlak dawn chuan roreltute thil tih Pathianin a tluan tir thei tawh lo tih sawiin, ''Independent body-a ding tur, fair taka sorkar hnathawk latu tur MPSC chairman ah Congress General Secretary an ruat dan chu, a tha dawn emaw a ti a. Kum lam over a ni tawh tih hmuhchhuah a ni a. Member atana Pastor an sawmna pawh an tluanpui thei rih lo va, he thil hi keia sawi ngai lo vin, mipuiin an hmu chiang,'' a ti bawk.

Sum harsat chhan chu thatchhiat vang liau liau a nih thu Pu Zoramthanga chuan a sawi a, ''Central sorkarin duat takin state tenaute leh NE phei chu a enkawl a. Puitlin zir ve turin min ti, nimah sela, Fapa indang tawh, a pa hnena kartin sum pûk hmanga khawsa thin ai pawhin kan sorkar hi chu a thatchhia, loh theih lohna avangin kum kal mekah Ways & Means Advance leh Spl. Ways & Means Advance-in vawi 69 RBI ah sum an pûk ringawt a, hei hi rulh leh ngai a nih avangin, Financial Emergency an tawnbuak a hlauhawm hle,'' a ti bawk.

Heti chung hian nawmchenna lam, Motor thar lei chung siin, January ni 28, 2013 atang khan Helicopter ah vawi 16 an zin tawh a. Helicopter chuan man July 2014 to February 2015 chhungin leiba nuai nuai 187 chuang an nei,” a ti a. ''Kum 5 chhung em pawh Motor thar an hman peih loh laiin, 'chatuan chhiah' Vehicle Lifetime Tax erawh mipuiah khawnin Cheng vaibelchhe 46 chuang an la lâwk tawh a, hetianga pawisak nei lo sorkar hi India ram state dangah a awm kan hre lo,'' a ti bawk.

Inkhawm hi Nghalchawm VCP, MNF Mamit East Block Treasurer, Pu J. Lalrozika’n a kaihruai.