PRESS STATEMENT
L.Thangmawia,
President, MNYF
Dated 3rd March, 2015

CONGRESS SAWRKAR-IN EDUCATION REFORM COMMISSION RAWTNA A HLAMCHHIAH

Congress sawrkar chuan ni 8.5.2009 khan zirna lama nasa taka hmalak tum awm takin Education Reform Commission a din a. He Commission hian July ni 1, 2009 ah hnathawk tanin July, 2010 ah report a peihfel a. Commission report chu zirchiang leh turin ni 24.9.2010 ah Group of Expert, Pu R.Laltawnga chairman-na hnuaiah member dang pali ruatin a din leh a. Group of Expert hian February, 2011 ah an report hi Chief Minister hnenah an thehlut a ni.

Group of Expert ten report an thehluh hnu hian 6.4.2011 khan Committee pahnih - Task Force leh Monitoring Committee te an din leh a. Mizoram mipuite leh Education veituten nghakhlel taka sawrkar-in Commission report-te a bawhzui dan kan bengkhawn reng laiin, vawiin ni thlengin tihlawhtling tura awmze neia hmalakna a la awm lo va, chuvangin tihhlawhtlin tumna tak tak tel lo va he Commission hi din niin a lang ta a ni.

Group of Expert-in February, 2011 a report a thehluh hnuah Mizoram budget vawi engemawzat pass a ni tawh a. Heng kan state budget-ah hian commission report rawtna tihhlawhtlinna tur kawnga ruahmanna awmze nei vawiin ni thlengin hmuh tur a la awm lo. Commission rawtna te hi tihhlawhtlin a nih dawn chuan budget a khawih ngei ngei a ngai si a ni.

Education Commission report peihfel tawh hnu ah, an rawtna a tel lo, zirna kaihhnawihah thil lian tham tak buaipui chiam an nei leh bawk si a. Kum 2011 khan Commission rawtna a tel miah lo, High School (Class IX & X)-a Mathematics optional a dah tuma hmalakna thui tak a kal hman a, ruahmanna an siam dan chuan 2012-13 atanga hman tan tum a ni. A syllabus te pawh duan fel hman niin a hmawrbawk a nih hma deuhin 2011 September thla khan kalpui chhunzawm lo tura thutlukna siam a ni leh ta a ni.

Tun hnai hian Zoram mipuite inhnialna lian tham tak ni mek, Zoram chhungkaw tin deuhthaw kaihhnawih, sikul tan hun sawn hma chungchang an buaipui leh vak a. Academic session thar (2015-16) atanga hman tan turin Cabinet Meeting chuan ni 18.2.2015 khan thutlukna an siam leh ta a nih kha. Hei pawh hi Education Reform Commission rawtna a tel lo bawk a ni. Zirna siamthat nana thil tul tak chu ni se, Education Reform Commission rawtnaah hian a lang ngei ang tih a rinawm.

Chuvangin, Congress sawrkar hian Education hi siamthat tumna tak tak a nei lo mai ni lovin, a ngaihthah niin a lang a. Sum tam tak senga a din Education Reform Commission rawtna te hi tihlawhtling tur hian tumna tak tak (Political Will) an nei lo niin kan hre bawk a ni.

Zirna siamthat hi kan ram tana thil pawimawh tawpkhawkte zinga mi a ni a, chuvangin vawiin atang chuan a behbawm vela kual kual tawh lo vin, mithiam ten Mizoram zirna siamthat nana an rawtnate hi tihlawhtling turin chak zawka hma an lak kan duh hle a, a tul angin sum leh pai ngai te pawh ruahman zel se tih hi kan duhdan a ni a, Mizo mipuite duhdan a nih pawh kan ring tlat a ni.

A khaikhawm nan chuan WORLD CLASS EDUCATION min tiam a, hetianga min kalpui zel a nih chuan WORLD CLASS EDUCATION nep ber min thlenpui dawn a ni.