Keifang Vengthar Kohhrana Pi Zohmangaih chu Kelkang an han kal tumin mihlim nu pakhatin, "Kros pu in khawlaiah i au a ngai a ni" a lo tih chu Feb. 28, 2015 (Inrinni) khan tihlawhtlingin, kawng zawh a ni a. Mi thahnemngai 50 velin phur taka zuiin Keifang khaw chhung chu hnehna puang leh tawngtai rual te, zai tein an fang a. Zing dar 10:00 vela Biak In atanga chhuak chu, tlai dar 2:30 velah Biak Inah an lut leh a ni.

He kawng zawhah hian taksa hrisel tha lo te leh nerve tha lo avanga tiang hawla kal ngai te pawh an tel ve a. An haw lam an haw kawng atangin nu pakhat, Sangtei, Pu Ngurauva nupui chuan naupai angin ka awm a ti ta tlat mai a, a kal pawh a kal tha hleithei lova. Taksa chetna chang thin nula pakhat chuan nau i pai a lo ti bawk a. Biak In thlen dawnah phei chuan nau vei tanin an zawn hial a ni. Tichuan Biak Inah zawn lutin lam tualah an mut a, nau a vei ta a, mihlim te leh mi thenkhat ten an vil a, an tawngtai bawk a, eng emaw chen an buaipui hnu chuan a hring ta a, taksa chetna chang pakhat chuan a vei chhung hian a lo vei pui ngat ngat bawk a. Tichuan, a hringtu nu rawn tho chhuak chuan a nau hrin chu 'IMANUELA' a ni tih hriattirin a awm a, nau hring zo tak tak ang maiin a thawl ta huai niin a sawi. Tin, nau hringtu nu hi naute pawm lai a ni a, zu te pawh lo zuar thin, tunlai harhna atanga rawn piangthar, an zu zawrh pawh sim ta an ni. 'Imanuela' tih hi Bible-ah a awm tih leh enge a awmzia tih pawh a hre miah lova, hriattir a nih angin a puang chhuak ve tawp a ni. 'Imanuela' = 'Kan hnenah Pathian a awm' tih chu Biak In chhung ngeiah a hring ta a, Kohhranhote Lalpan min awmpui tih a chiang hle mai. Lalpa chu fakin awm rawh se.

Tin, he kawng zawhnaa tel ve Pu Lalbiakzuala, nerve tha lo avanga thla hnih chuang tiang hawl lova kal thei miah tawh lo chu, Mar. 1, 2015 Pathianni atang khan tiang tel lovin a kal thei ta ringawt mai a, inkhawm kalkawngah te pawh amaha kalin Pathian fakin a lam thei ta der mai, Lalpa ropui ber rawh se.

Hetianga Thlarau Thianghlim hnathawh a thlen mek lai hian, setana pawhin tan lain a chhe lai sawi tur zawng pawl hi an lo awm ve reng a. Mi zawng zawngte hnena ka ngen duh chu, a chhe lai châng ràna sawisel tur leh a mawi lo lai sawitu nih ai chuan, Thlarau Thianghlim Harh tharna changtu ni ve ngei tura Pathian hnenah dilin tawngtai ila, he harhna ah inchiah ve ngei tum theuh zawk ang u. Lalpan malsawm rawh se.