Nimin a Mizo Students Union leh Aizawl City Colleges Joint Students Union huaihawta Aizawl khawpuia kawngzawh chu MPCC chuan pawi an tiin he harsatna hi MNF telna NDA vang niin an sawi.

MPCC chuan Centrala UPA sorkar chhung zawng leh tunhma zawng khan Tribal Scholarship Centralin min rawn pek thin chu State tum ve tur a awm ngai lova. Centrala NDA nikuma an sorkar atang khan State tum ve tur, za zela 10 chu ruahmanna a rawn siam ta a. Mizoram sorkarin Budget tur a duanfel vek tawh hnu, siam that hleih theih a nih tawh loh hnu, February 13, 2015 pawisa sanction na hi lo thlengin hetah hian Mizoram sorkarin za zela 10 a tum ve tur thu a rawn chuang a. Hetichung hian zirlaite hmakhua ngaih avangin Mizoram sorkar chuan tih dan awm thei ang ang dap chhuakin March 2015 chhung ngei a zirlaite scholarship chu pek kim a tum thu nizan, March 1, 2015 khan Mizoram sorkar chuan thuchhuah siamin chanchinthar lakhawmtute leh zirlai lam te pawh a hriattir nghal a.

Mizoram sorkar chuan hetiang a nih chuan zirlaite pawh an lung a awi ang a, mipui tibuai thei kawngzawh pawh an sut leh mai ang chu ti a ngaihtha taka a awm laiin zirlaite hian kawng an zawh leh tho mai a ni.

He harsatna hi MNF telna NDA sorkarin Tribalte min duhsak loh zia a tih lan avanga lo chhuak ta a ni tih mipui mimir leh a bikin zirlaite hian hria se MPCC chuan a duh tak zetthu thuchhuah siamin an tarlang.