Chief Minister, Pu Lal Thanhawla’n Bandh siam chu Kristianna nen a inhmeh lo hle a ni, a ti. Feb 27 khan Congress Bhavan- ah thusawiin Pu Lal Thanhawla chuan, Total Bandh hian sorkar tan harsatna a siam lo a, mahse, mipui, ni tin eichawp zawngte tana harsatna siamna a ni a, heng mite tana harsatna siam hi a Kristian lo hle a ni, a ti a, thisen sawngbawlna man lak chungchangah MNF party-in thu dik lo-in sorkar an puh nia sawiin, a vawktu-in ek a la cheh dawn niin a sawi.

NLUP chungchang sawiin Pu Lal Thanhawla chuan, sorkar laipuia NLUP hektute zingah Mizoram BJP tel ve mah se, NLUP chu hek chhiat mai mai chi a ni lo a, tunah pawh sorkar laipuia an dil ang zat chiah an hmu niin a sawi a, Mizoram sorkar-in Finance Commission a lo dawnsawn danah Commission a lawm a, Mizoram hmabak chu a eng hle niin a sawi.

MPCC President ni bawk, Pu Lal Thanhawla chuan, Kuki hel pawlte’n sorkar laipui nena inbiak dan zawnpui tura an ngennaah pawl khat hlawma insiam tura a rawn angin Kuki National Organisation a piang a, heta tel ve duh lo, pawl te reuh te chu kum 2006 August 15 khan khatih laia CM, Pu Zoramthanga ruahman angin a bangla-ah an inhmu khawmin pawl an din ve niin a sawi a, tun hnaiah KNO palai atana amah sawm turin MNF President hi a intawktarh nia sawiin, inkahhai a awm laiin remna a awm theih nana palai hna thawk tura a inpeih thu sorkar laipui hnenah pawh a hriattir a, sorkar laipui chuan an mamawh loh thu-in an lo chhang niin Pu Lal Thanhawla chuan a sawi a, Pu Manmohan Singh-a PM lai khan Pu Zoramthanga chu palai-a a tan theih nan a tul angin a biaksak niin a sawi bawk.

MNF chu NDA sawrkarah an tlaktlum a rin loh thu sawiin Pu Lal Thanhawla chuan, UPA sawrkar hlim khan UPA laka an tlaktlum loh hlauh avangin MNF hian NDA an thlawpna an tihtawp avangin NDA sorkarin MNF chu mi pangngaia an ngaih a rin tawh loh thu a sawi.

Sorkar laipui hotute, Mizoram- a an lo kal ve duh loh chhan chu Mizoram-ah Congress sorkar a ngheh avanga tihnghin an inrin loh vang a nih a rin thu sawiin Pu Lal Thanhawla chuan, Central-a BJP kaihhruai sawrkar chu a din rei a rin loh thu a sawi a, Kristian Biak In an suasam dan leh Kristian te an tihduhdah danah Pathian mit naute an khawih tawh niin a sawi bawk.