Maubawk Branch YMA in Tlawng lui Damli kam a Venbuk Thlam an sak chu 28.02.2015 chawhnu dar 2 khan Khuallian Pu C. Ngunlianchunga, DM & R Minister chuan a hawng. He hunah hian khuallian Pu C. Ngunlianchunga chuan thusawiin, "Vawiiah hian YMA hmel a lang a, YMA Moto a lang a ni" a ti. YMA te chu chhiatna lo thleng reng rengin a che chhuak hmasa ber First Response an nih thu a sawi a. DM&R leh YMA chu kalkawp tlat an ni tih hria a, hmalakna tur kawng hrang hrang a hma la zel turin a chah bawk.
Minister hian DM&R hmalakna hrang hrang te a tarlang bawk a ni. Tin, Maubawk YMA ten Construction of Ngar post estimate an siam chu hotute nen sawiho a, pek leh ngei an tum thu a sawi bawk a ni. Tlawng lui (Reiek kai) ah hian kum tinin chhiatna (Tui tla) a thleng thin a. Heng chhiatna a thlen chang apiang hian a bul hnai Branch YMA te chu a che chhuak hmasa ber niin, buaipui ngai awm ang ang te rang tak leh theihtawp chhuahin buaipui nghal a ni thin. Hetiang tui tla avanga vanduaina a lo thlen hian hruaituten ruahmanna fel tak leh ngaihtuahna fim tak nen ruahmanna an siam thin a, tlawng kamah tlangvalte rem leh rem lovin, a thim a var thlu lovin an riak thin a.
Heng vanduaina lo thlen palha mi tlawmngaite innghahna turin Maubawk Branch YMA chuan he Venbuk thlam hi an sa ta a ni.

Tin, he hun hawnnaah hian Pu Vanneihthanga Vanchhawng, LPS Special Reporter chu chawimawina an hlan nghal bawk. Mizo mipuite tana chanchinthar min hriattirna kawngah a hnathawh thatna avang hian Zoram chhung zofate leh ram pawn zohnahtlakte thlengin nasa takin min ti pumkhat a. YMA hnathawh ropui taka mi pho lan sak thinna hian tlawmngaihna nasa takin a ti par vul thin bawk a. Tin, tanpui ngaite tanpuina kawnga a hnathawh rah avang hian tanpui ngaiten nasa taka tanpuina an hmuh thin avangin Pu Vana chu chawimawi tlak tiin an chawimawi a ni.