Thailaite hian a thu chuan dikna leh rinawmna hi kan duh niin a hriat a, ram hruaitûte pawh kan phût na hle thîn a; mahse, kan hma zâwn tê têah theuh hian keimahni hian dikna leh rinawmna hi kan laltîr em tih kan inen fiah ngam meuh em le?!

Dik lo taka sum lâk luh hawtu inti thalaite hi, zirlaite tâna scholarship lâk chungchângah te hian kan dikin kan rinawm rêng em le? Hei hi ka sawi duh, huaisen leh ât fâwmin mahni han insawi hmiah ta ila, need base-a dîl leh hmuh theih tûr chu ni se, a mamawh ber ber chhûngkaw zînga mi kan ni chiang nâin, keini chhûngkua hi chuan Tribal Scholarship leh Minority Scholarship hi chêng khat mah kan la dawng ve lo a, vawi khat mah kan la dîl ngai lo bawk. A chhan chu, a dîltu tûr zirlai parents' annual income bithliahin min phuar a, kan innghahna bible- ah he scholarship norms hi inziak lo mah se, bible-ah chuan dikna leh rinawmna erawh a inziak thung a ni.

Ka fahrinte hian parents' annual income certificate dik lo nên an vaiin hêng Scholarship hi dîlin hmu ve thîn chu ni se, NLUP aia sum hlâwk zâwk, kut tling loin kum tin sum kan hai lût ve thei reng a; mahse, pâ ber thurolum chi, "Dîl thei lo leh hmu lo tûr in ni a, ka thu âwih loa nangmahni thua in lo dîl ve ringawt a nih chuan, ka hnênah rawn haw suh ang che u," tih a ni rup mai!

A pâwng apuia, "Eng nge in nih bîk?!" han intihna tûr chu kan ngah mai thei; mahse, kan confi a, kan zalên êm êm a, han inthiam loha mi dang lakah pawha han tit rûkna chhan tûr engmah kan nei hauh lo a, ka lâwm hle.

Tribal nih avâng ringawtin Tribal Scholarship hi kan chanvo (to be claimed as Right) a ni mai lo a, kristian kan niha Minority kan nih hian Minority Scholarship hi ka la ngei ngei tûr tihna a ni ringawt hek lo! A dîl thei chinin an dîl anga an han hmu te hi chu an lawmpuiawm tak zet zet a; mahse, dik lo taka parents' income (certificate) ziak chunga dîla latûte hi chuan dikna leh rinawmna chungchâng te, dik lo taka sum leh pai lâk luh duh lohna thu te hi sawi ngam ve tûr in ni ve dâwn em ni?!

Mi dik leh rinawm, dik taka Scholarship la tûrte chauhin Scholarship phûta kawng in zawh dâwn chuan, dîl ve lo leh la ve lo tûr ka fâte pawh in hnung zui tûrin tihluihna paw'n ka rawn tîr chhuak ve ang!

A dik tak chuan sawrkâr hnathawk IV Grade senior tawh chin chung lam zawng fâte hian parents' annual income avângin Tribal Scholarship an la thei lo vek a, chutiang IV Grade kum khat sum lâk luh ang la pha chinho mi dang - politician,sumd âwng, contractor, inhlawhfa, kut hnathawktu, etc. zawng zawng pawhin an la thei lo vek bawk!

PARENTS' ANNUAL INCOME IN ZIAK ANG CHIAH HI HLAWHTÎR CHE UIN SUM LA LÛT NI TA ULA, HETIANGA DIK LO TAKA TITÛ NANGMAHNI THO HIAN IN DUH KA RING LO HUL HUAL BAWK.

Âw Zoram, dik lo taka sum lâk luh huatna thu te, dikna leh rinawmna chungchâng te hi au chhuahpuitlâk i ni ve lo a ni mai lo maw?! Ka lainat ngawt mai che, âw Zoram.