Aizawl Municipal Council chuan March ni 2, 2015 (Thawhtanni) atangin Maxicab Stand leh Dropping Zone a siam te hman tan a nih tur thu an puang.
AMC Councillor Parking of Vehicle changtu Pu Rosiamngheta chuan AMC Office Thuampuiah Press mite kawmin he thu hi a puang a. Aizawl Municipal Council hnuaia Parking Committee Nov 17, 2014 thukhawm chuan Aizawl khawpui chhunga Maxicab Stand te Aizawl khawpui daiah sawn chhuah a rel a, Dec 12, 2014 a Board of Councillor meeting chuan a pawmpuui bawk a. Maxicab Stand tihdanglam tur hi Mizoram Maxicab Owners Association, Traffic Police, Aizawl City Local Council leh AMC tangkawpte thutlukna a siam a nih thu a sawi.

Pu Rosiamngheta chuan "Kan khawpui tawt zelah traffic jam avanga harsatna kan tawh bakah mipuite him tlan zawk nan he thutlukna hi siam a nih thu a sawi a, mirethei zawkte hmuhsit vang a ni lo" a ti.
Sumo neitute pawh khawtin atanga sumo stand a hnaih tawh dawn avangin a fare te pawh tihniam ve tura an ngen thu a sawi. Maxicab stand thar tur hi hmun 4 ah ruahman a ni a,
Hmar lamah Greenwood Hospital chhak Mahindra Showroom opposite kawng thlang lam 158 metrs a sei a ni a, hetah hian Inter-state sumo ( Silchar, Shillong, Guwahati) leh Mizoram chhung Zanlawn tlangdung, zing chhun leh zana chhuakte an ni a.

Hmarchhak lam chu Bawngkawn Lunglei Road Hauva Petrol Pump bul atanga Thuampui Helipad hnuai inkar 307.6 metres chu Inster State Sumo Manipur, Ratu tlangdung, Serchhip tlangdung leh Champhai tlangdung te an ding ang

Chhim thlang lam Hunthar lei tlahniam kawng thlang zau laiah hian W.Phaileng, Rawpuichhip, Mamit leh Hachhek tlangdunga tlan te zing leh chhun chhuakte an ding ang.

Chhim lam Ngaizel pheiah tuna Maxicab dinna 81 mtrs a sei leh Bus stand piah kawng thlang zau lai 143 metrs-ah Lunglei, Saiha, Lawngtlai, Thenzawl. Darlung, Sateek, Sialsuk, Aibawk, Hmuifang, Chamring, Sumsuih, Tachhip leh a dangte, zing leh chhuna chhuakte an ding ang.

Maxicab Dropping Zone hi Ramhlun North Pu Lalthanliana building atanga Sunrise Hardware dawr inkar, Chamari to Ramhlun Road, Lower Chanmari - Lower Zarkawt - Dawrpui tuna hman lai mekah, Zodin Bunghnuai atanga Zodin lam, Mission veng Bazar atanga Sikulpuikawn inkar, Tennis Court atanga Khatla inkar, Upper Bazar Thana peng atanga MC hrul MC chhim lam hungna inkarah te siam a ni.

Maxicab chhuak Aizawl khawpui chhungah passenger te drop in an tlankual thei ang a, chumi hnuah stand-ah theuh an ding ang.
Maxicab chhuak tur reng reng chuan Aizawl khawpui chhungah passenger an pick-up tur a ni lova, passenger ten an stand an pan tur a ni.