MNF chuan nau chunga nu pathum lai an thih chungchanga Kolasib block congress te thu chhuah nuihzatthlak an tih thu an sawi.
MNF chuan Kolasib Block Congress te chu an mahni khua, Kolasib chanchinbu rintlak tak ‘Kolasib Aw’ leh a dangte’n an tarlan chhiar na chang hre tawh turin an ti a. February ni 13, 2015 zirtawpni-a Kolasib district Vigilance and Monitoring Committee, DC Conference Hall-a Meeting naah Chief Medical Officer(CMO) Dr. H. Lalchungnunga’n report pe a, ‘sorkarin thisen sawngbawlna man a bituk pek tur pawisa an neih loh vangin a hun takah thisen an dawng thei lo va an boral ta a ni,’ tia a sawi aia thu rintlak zawk sawi tur an neih chuan Congress party hian sawi rawh se tiin an thuchhuahah chuan an tarlang.

MNF thuchhuah chuan, CMO-in “thisen sawngbawlna man hi thisen lakchhuah hmain pek ngai a ni,” a tih pawh hi, congress party hian hre tel ngei se la, MP (LS) Pu C.L Ruala’n MLA pahnihte hnenah ruahmanna tha zawk siam a, chutiang thil chu a thlen tawh loh nan department lamte pawh ruahmanna siam turin a hrilh a nih kha. Insawithiam chawpa fihlim tum ringawtin congress party leh Health Minister Pu Lal Thanzara hian tan khawh fo duh suh se. Mi retheite lu chunga vaivut takngial pawh an ît tawh a, pachhiate an rûk sak mêk a ni zawk e, tiin MNF thuchhuah chuan a tarlang bawk.