MNF High command vawiin february 19 chhun Dar 12:00 a thukhawm chuan, February ni 25, 2015 (Nilaini) zing dar 5:00am atanga chawhnu dar 5:00pm, darkar 12 chhung mipui thlavang hauhna Total Bandh neih a tum chu khawng taka kenkawh an rel.

MNF National Executive thukhawm hian Mizoram pum huap total bandh neih turah, khawng taka kal an rel a. Aizawl khawpui bikah chuan General Hqrs.-a nihna neite chu, mahni Constituency huamchhunga duty post hrang hrang a duty theuh turin ruahmanna a siam a. Total bandh ah hian sorkar pisa, zirna in, sumdawnna hmun leh bank te khar vek a, sorkar, mimal leh sumdawng motor leh lirthei dangte a tlan bakah Mizoram pawn atangin eng lirthei mah luh an phal dawn lo a, Infiamna lam chi reng reng tih phal dawn lo bawk.

Duty tih loh chu tumah chhuahvah phal dawn lo a ni. Bandh hian Damdawiina thawk leh duty, Tui sem tute, Electric line duty, Police uniform ha, Army leh paramilitary force uniform haa duty, Media mi card nei, Bawnghnute sem leh MNF General Hqrs.-in permit a pek te a ngaihhnathiam dawn tih an sawi a ni.

MNF High Command meeting chuan chhiah chi hrang hrang uchuak taka tihsan avang leh Thisen man hial congress sorkarin a lak avanga ‘Kawng zawh’ a lo buatsaih tawh leh, Governor hnenah Memorundum thehluh a nih hnu pawha, Congress sorkar- in runluihna tawngkam an hmang zui chu, a ngaihzam loh tur thu a sawi a. ‘MNF-te chu â der ang te leh an duh chen chen bandh rawh se, ti a, ram hruaitute thusawi chu a thlir mai mai dawn hauh lo tih Congress sorkar hian hria se, an duh tih sawiin Mipui thlavang hauh nan Jail tan hial pawh huama mi pawimawhte hual bet tur te, a tul a nih chuan na taka chet zui tha an ti tlang niin an thuchhuah chuan a tarlang a ni.