MNF vice president R Tlanghmingthanga chuan, MNF sorkar laiin thisen sawngbawlna senso lak rawtna a awm tawh a, mahse miretheite harsatna thlen theitu nia an hriat vangin an hnâwl niin a sawi a, "Kan sorkar leh hunah thisen sawngbawlna man lak hi kan titawp ngei ang," a ti.

Nimina Mizo Hnam Runa inkhawmah thu sawiin, R Tlanghmingthanga chuan, "MNF sorkar lai pawha thisen sawngbawlna man (blood processing fee) la tura nawrna a awm thin a, mahse thisen sawngbawlna man mipui chawitir kan remti lo a, MNF sorkar tan luhaina tham a ni tling lo, tiin ka lo hnial thin," a ti.

MNF vice president chuan, Congress sorkarin thisen sawngbawlna senso phuhrûkna tura thisen unit khata Rs. 550 zel lak chu a chhan leh vang sawifiah chiam a ngai lo tih sawiin, "A ngawng tur thlir tela mi rethei zawkte'n an tawrh dan tur chhût hmasak zawk tur a ni," a ti a; MNF an sorkar leh hunah chuan thisen sawngbawlna senso lâk chu an tihtawp ngei tur thu a sawi.

R Tlanghmingthanga chuan, tun hnaia MP CL Ruala hoa Kolasib District Vigilance & Monitoring Committee meeting-ah Kolasib CMO Dr Lalchungnunga’n sorkar kum kal mekah Kolasib district chhungah nu naupai raicheha thi pathum an awm thu te, chûng mite chu thisen pek ngai an nih thu leh, thisen sawngbawlna man pek tur pawisa an neih loh thu a sawi tih sawiin, hriatthiam harsa an tih thu a sawi.

Kolasib district-ah a hun taka thisen pek loh vanga thi an awm chu sorkar mualphona a nih thu sawiin, R Tlanghmingthanga chuan, "Sorkar mualphona mai a ni lo a, kalphung thlak hlawkna tham tling a ni," a ti.