Dt.22.01.2015 khan MNF party chuan Mizoram hmun hrang hrangah ‘Mipui Thlavang Hauhna Kawngzawh’ an nei a, Aizawlah chuan Chanmari Kawn atanga Vana Pa Hall kawt thlengin kawng hi an zawh a ni.

Aizawl-ah chuan Chanmari atanga vanapa Hall thleng kawng zawh a ni a, Chanmari kawnah Pu R Tlanghmingthanga, Zarkawt-ah Pu Lalthlengliana,Isreal Point-ah Pu Lalruatkima, Vana Pa Hall kawtah Pu Tawnluia leh Vanlalzawma ten thu an sawi.

Kawngzawh tanna a thusawitu MNF Vice President Pu R.Tlanghmingthanga chuan Delhi fahrawn Congress min enkawl danah Mizo mipui kan him ta lo a, kan ram a him ta lo bawk a, a theih ang angin, a rem leh rem lote,m a mawi leh mawi lo pawh thlu lovin anmahni lala siamtu Mizo mipuite eiralna tur kawng an dap ngar ngar a, a em em lutuk tak avangin hetianga kawngzawh hi MNF hian a rel ta ani tiin Aizawl bakah district capital theuhah mipui thlavang hauhna kawngzawh kalpui anih thu a sawi a.
He sorkar hi mahni nihna hre lo sorkar, an tih tur tilo a, an tih loh tur ti, mipui sorkar nilo, Congress party sorkar ani tiin Mizo mipuite kan thlamuan tak loh thu uar takin a sawi.

Isarel Point a thusawitu Pu Lalruatkima MLA chuan, Congress sorkar kum 6 zet kan hrawn hnu ah kum 7-na kan chuan kai meuh chuan mipui te mangang a awm in mizo mipuite thlavang hauh hial an lo ngai ta a. Mizo mipuite manganga an awm chhan chu financial management-a an hlawhchham vang leh sorkar hotuten ram hmasawnna aia nuam tawlna ringawt an ngaihtuah vang a ni a ti.

Kawngzawh khaikhawmna Aizawl Vanapa Hall kawta neihah MNF Sr. Vice President Pu Tawnluia chuan Congress sorkar kan hrawn mek hian miretheite kan VIP ti chungin nasa takin mipuite min rawk mek a, Buhfai kg 1 Rs 9.50 in kan sem thin chu tisangin “Buhfai man hi Mizoram sorkar tihsan a ni lo, Central sorkar tihsan a ni” tiin mipui te min bum an tum a. Buhfai man hi kan state sorkar tihsan ngei a ni, Mirethei ten mittuitla chunga Ration latura an kal laiin kan Chief Minister chu Helicopter-in a thlawk vuah vuah a ni, a ti

Sorkarin sum harsat chhan chhuan lam a siam tamna ber IR Battalion din belh leh School Provincialise belh pawh MNF sorkar khan mipuite mamawhna avanga a tih a ni, an hlawhpek dan tur leh a hlawh tur-ah MNF sorkar kha a buai ngai lo. Kan home Minister-in ‘nikum 2014 chhung khan IR battalion hnih daih Police 1500 kan ban tawh’ ti chung si a, an hlawhah harsatna kan tawk a ti hi chu sum enkawl (Financial management) an thiam loh vang leh nuamtawl an hrat vang mai mai a ni. Vawiina kan kawngzawh hi a tawpna tur a ni lova a bul tanna tur chauh a ni, a ti bawk. Kawngzawhnaa MNF hruaitu thusawitu dangte pawhin Mizoram hian chhanchhuak tu a mawmmawh hle tawh thu te, hetiang renga kan ram hi a enkawl tuten an enkawl chhoh zel chuan thim chhah tak hmachhawn in kan ram hi chhan tlak loh khawpin a chhia ang tih an hlauh thute an sawi bawk a ni.

Kawngzawh tawpah hian Mizoram Larsap chenna Raj Bhawan-ah kalin memorandum point 6 an thehlut a ni.