MIZO NATIONAL FRONT, GENERAL HEADQUATERS
AIZAWL : MIZORAM
PRESS RELEASE

AMC buaina bulpui, a ‘Kaikuang’ chu Minister Zodintluanga a ni.

Aizawl Municipal Council Sorkar 2010 October thla-a ding chuan term khat a hman zawh hma hauhvin buaina a tawk zing hle mai hi MNF chuan pawi a ti tak zet a. AMC buaina bulpui ber leh harsatna thlentu bulthum ber, ‘a Kaikuang’ chu AMC Nodal Minister, i.c UD&PA Pu Zodintluanga hi ni ngeiin, MNF chuan a hria.

AMC sorkar Congress & ZNP kal tha lai kha MNF chuan tluang takin term hmang tluan thei se, a duh a. Hetih lai hian MLA General Election 2013-a neih a nih hnu khan Congress sorkar chuan AMC sorkar dinglai chu a ringhlel tan a. ZNP Councillor thenkhat leh MPC councillor pakhat chu UD&PA Minister, Pu Zodintluanga Office-ah a rukin an inhmukhawm thin a. Party pakhat chhunga Councillor thenkhat, Minister Pu Zodintluanga’n a ruka a thlem chhuah theih te nen AMC sorkar thar dina a ruangam tur pawh sawifel sain Chairman dinglai chu thlak turin ruahmanna thui tak an kalpui hman a.

Hetiang dinhmuna an din lai hian, Minister Pu Zodintluanga’n Councillor thenkhat ‘uire’ a tum mekte chu an mahni party lamah an inlamlet leh avangin, UD&PA Minister ruahmanna zawng zawng chu a hlawhtling lo (flop) ta a. Hetianga a ruka an ruahmanna te chu engmah lova a chan leh tak avangin July ni 17,2014 (Thursday) chuan chanchinbu mi te zawhna chhangin UD&PA Minister Zodintluanga chuan, sorkarin Aizawl Municipal Council (AMC) a thiah (dissolve) theih dan chi hnih a hriat thu hmangin Opposition party pathumte chu a vau zui nghal pang a.

AMC chairman Pu Zarzoliana kaihhruaiin thla 6 chhung sorkar a kalpui leh, an sum khawih 13th finance commission atanga fund lo kalte chu, a hun takah pe chhuak tha duh lo vin an hrek zui thin a. AMC sorkarin hnathawhna tur sum an neih ve ang angte chu, congress sorkar sum harsa tak hian, it thamah a ngai tlat a. AMC sorkar dinglai chu kawngtin renga namthluk dan dapin UD&PA Minister chu a hmanhlel ta a. AMC chairman hlui CT Zakhuma te chu MPC ho a dawr tir ta a. Chhuanlam dawrawm te te leh, thudik lo hmangin MPC Councillor te thlauhthlak tumna a awm, tiin, thu an than tir ta daih a. AMC Sorkar chu namthluk a lo ni leh ta a. Heti teh hrepa AMC sorkar hmai tibaltu leh, zahthlak taka Mizo mipuite hnena AMC sorkar a mawilo thei ang ber leh mualpho taka siamtu leh ‘Aizawl Musical Chair’ ti hiala an koh nawmnah na chhan, ‘A KAIKUANG’ chu UD&PA Minister Pu Zodintluanga hi a ni, tih, MNF chuan a sawi duh a ni.

Hetianga sawp hlawh taka AMC a kal laia, MNF councillor te’n rinawm tak leh a thlangtlingtu mipuite zah vanga nghet taka an ding hi, MNF chuan a chhuangin a chawimawi tak zet a ni.

(ZOBIAKVELA)
Joint Secretary
Inf. & Publicity Department
Mizo National Front
Dated Aizawl, 12nd. Feb.2015
Memo No. MNF/3/Pub/2015/20