February ni 8 zan dar 7 rik hma deuh khan Durtlang field thlanga Er. Valbuanga thlam chu a kang a, he thlam nghaktu te chhungkaw pa ber chu a kang tel.

Thlam nghaktu Dawnga (Chaltlang veng lam mi nia hriat) ruang nia rin chu hmuh a ni a, a kang chhe hneh hle a, tunah hian khawih sawn lovin forensic lam mi te nghah an ni a. 8:32pm ah pawh an la thleng lo. Ruang dahna tur kuang YMA lamin an buatsaih.

Mitthi hi PC Laldawngliana kum 35 mi Bilkhawthlir khaw chhuak a ni. Nupui neiin fa 2 a neia an nu nen hian inthenin a fa te hi an nu bul lamah an awm a. Amahin mi huan enkawlin thlamah hian a cheng a.
Kangmei a han chhuah khan amah hi hmuh a nih mai loh avangin a kanghlum nia rin a ni a. Rin ang ngeiin a ruang hi hmuh a ni ta a ni. Dawnga ruang hi a U, PC Remlalnghaka Chaltlang venglaia cheng chuan a la ang.