February ni 6. 2015 (Fri) Mizo Hnam Run inkhawmah MNF Sr. Vice President chuan thu a sawi a, “Congress sorkar hnuaia thil duhawm lo a thlen apiangin mi dang puh an chîng a. Hetiang sorkar hi ding zui zel tlak a ni lo va dawizep thuamhnaw a ni,” a ti.

Pu Tawnluia chuan, “Chief Minister Pu Lal Thanhawla’n Zu zawrh an tum chhanah Kohhran hruaitute te hial hmer tela, ‘kohhranin an tih tur an tih loh vangin zu in lo thei lote buaipui an ngai,’ tia a sawi chu a demawm takzet a ni,” a ti a. “Zu chhiah an ît vang leh sum dinhmun siam that nan, thlan na-awm lo ber Zu zawrh an thlang a ni zawk,” a ti.
‘MNF te’n Zu an rui,’ tia Pu Hawla’n a sawi pawh chhangin, “MNF hian Zu a rui lo va, zu zawrh kan duh loh thu kan au chhuah pui zawk a ni,” a ti. MNF Vice President chuan, ram pum huap ‘total bandh’ MNF-in a neih ngei tur thu a sawi nawn a. Mi tlawmngai te’n a thlawna thisen an pek, dam lo te’n thisen dawng tura Unit khatah Rs. 550/- an chawi tir chu, sorkar sum harsat zia ti chiangtu a nih thu a sawi a. National AIDS Control Society (NACO)-in 25% state sorkarin tum ve tawh tura a tih zat hi Rs. 375/- a ni a. Hetih lai hian Congress sorkar chuan 20% chu an tum thei lo va, damlo te an tuar tir a, chuti chungin 36.7% Rs. 550/- an lak sak a, he thil hi MNF chuan engti zawng mahin a hrethiam thei lo va. MNF Sorkarin Health Care Scheme a duanchhuah hmangte khan sorkar hian ruahmanna nei zawk rawh se, a ti bawk.
Tui Bill, Electric bill leh Buhfai, Leiman ah te mipui zawh tawk aia sanga chhiah an khawn chiam pawh hi sorkar mumal lo awm dan a ni a. NLUP-ah cheng nuai khat an sem a, an insem kâwt vek a, mipui hnenah min rûl let leh rawh u, an tihnaah kan ngai a ni, Pu Tawnluia chuan a ti bawk.

Mizo Hnam Run inkhawm hi Pu F. Aithanga PAC-in a kaihruai a. RC. Lalhruaitluanga Joint Secretary-in hunserh a hmang bawk.

(ZOBIAKVELA)
Jt. Secretary, Inf. & Publicity Department,
Mizo National Front
Memo No. MNF/3/Pub/2015/ 16
Dated Aizawl, 6th. Feb. 2015