February ni 5 zan dar 10:30 vel khan Police Constable Rajiv Kumar (43) Bihar lam mi chu Saiha a an chenna Inah a pistol kawl laiin a inkaphlum a, a ruang hi Bihar lam panpui a ni.

Saiha Police Station atanga thudawn danin Rajiv Kumar hi Saiha P/S hnuaia reserved branch-a awm a ni a, hnamdang a nih vang leh Saiha SP hnamdang a lo nih ve bawk avang tein tawng lamah remchanna a awm a, Saiha SP security team-ah dah a ni a, Saiha-ah hian a nupui leh a fate pahnih nen khawsain Mizorama a awmna a rei tawh hle niin thudawnna chuan a sawi.
Rajiv Kumar hian inkahhlumna atan hian 9mm calibre (Glock) pistol a hmang a, zan dar 10:30 vel khan an chenna In-a an bedroom chhungah pistol hian a bek vei lamah chuktuahin a inkap a, silaimu hi a chhip dinglamah a tlang niin mita hmutu te chuan an sawi. Saiha Police Station atanga thudawn danin Rajiv Kumar hi a chatthla nghal mai lova, Saiha Civil Hospital panpui a nih hnuah a hliam tuarloin a boral zui ta a ni. A inkah hlumna chhan hi engmah hriatchian theih a nilo va, amah hi BP sang nei a ni a, hei hian a rilru lamah harsatna a thlen ni a rinna te pawh a awm niin an sawi.

Thudawn danin Rajiv Kumar hi pa kawm nuam leh fel tak a ni a, mi pawisawi ngailo leh thawhpui nuam tak a ni. A ruang hi Saiha Civil Hospital-ah postmortem tih a ni a, hemi hnu hian Saiha Police Station Staff leh SP staff te chuan thlahna hun an hmang a, nimin khan Bihar lam panpui a ni.
.