Feb 06, 2015 zirtawp zing dar 9 vel khan Kawnpui dai, Khankawn chhak Zanlawn Ramchin, Chhimluang kama Pi Hliri, Chatlang Aizawl huan thlamah ruang 2, mi kut tuara thi ngei nia rin hmuh a ni. Heng ruang te hi Ngura, Aizawl lam (Pi Hliri huan enkawltu) leh Nghaki, tuna Kawnpui Vengthar a awm, a pasal Dawnga (L), Lungdai khaw chhuak te an ni. An landanah hian mi kuttuar ni ngeiin an lang a, an lu ah hian na taka vuakna leh sahna hnuhma a awm nual a, nizan lama thi tawh ni a rin a ni a, an taksa hi a khawng vek tawh a ni.

Thlama an ruang hmuh a nih lai hian mipa zawk hi khumah thawmhnaw inbel lovin fel takin a mu a, hmeichhia zawk hi chhuatah bawksawp nuaiin a lo awm thung a, thawmhnaw tlem a zawng chauh a inbel a ni.

Nimin lam khan Pi Nghaki te thian dun hian Hmuhphiah an kek a, nimin tlaiah a thiannu in hawnpuia a sawm chuan, "Ka haw peih lo, naktuk a i lokal leh dawn tho chuan ka riak mai ang," a ti niin a sawi a, tukkin zinga a thiannu a zuk kal leh in thlam pawn atanga a'n bih chuan thlam chhunga thi nena an lo inchiahpiah nuaiin a hmu ta a. Hlauthawng takin midang pun turin a tlan let leh ta ni.

A thiannu sawi dan hian nimina a hawnsan dawn lai hian Zanlawn lam mi mipa 2 dang an awm ve niin a sawi.

Ruang te hi Kawnpui-ah Doctor a awm loh avangin Lungdaia Postmortem turin Pi Nghaki Nu te awmna lam Lungdai Hmarveng YMA ten Kuang 2 rawn kengin an rawn la a, Lungdai Damdawiinah Post Mortem tura ruahman a ni a, Lungdai atangin Ngura ruang hi Aizawl lamah pan pui leh a ni ang.

Thu kan dawn danin anmahni thattu hi Hualliana, Manipur lam mi, tuna Kawnpui Hmarveng a khawsa niin police hnenah a inpe tawh a ni.