Thuthlung Hlui kan en chuan sakhaw hruaitu leh hnam hruaitu mi thuhmun an nih hi kan hmu tam hle a. Chu lam chu kan chhui hman lo vang a. Vatican City khu khawvela independent ram te ber a ni a. Pope chu sakhaw (Roman Catholic) hotu lu ber leh an ram lalber (head of state) a ni nghal a ni. ("Politics-te chu rawngbawltute tel vena chi a ni lo," an tih ve loh hmel khawp mai!) Gordon, S.Wakefield chuan, "Kum zabi sawmpangana leh sawmparukna velah kha chuan 'thlarau mi' tih tawngkam hi puithiamte leh kohhran bungrua leh sum hnar sawi nana hman a ni a. A hnu lamah erawh hi chuan thlarau lam thil leh taksa lam thil hi a inthliar hrang ta a ni" a ti a. Amaherawhchu, dik taka sawi chuan thlarau lam thil tih leh taksa lam thil tih hi thliar hran theih, inthen sa deuh ruak anga lang, mahse thliar hran dawna a daidanna lai hriat hleih theih loh, sazu mei a zuihna lai hriat loh ang deuh a ni.

John Calvin chuan Kristian thlarau mi a sawi dan chu Pathian chungnunna leh thuneihna pawm te, Thlarau Thianghlim hruaina zui te, Pathian thu (Bible) awih leh thilsiam dangte nena inremte hi a ni a ti a. A tlangpui (general) lutuk deuh em aw? tih mai tur a ni. Mahse han chhut chian chiah erawh chuan paih tur chu a vang khawp mai.

Awle, Kristian Thlarau mina chungchangah hian mi thiamte sawi dan la khawm dawn ila ziah sen loh a awm ang a. Chu lam chu kan buaipui lo vang a. Bible-in min hrilh dan hi kan pawm dan tur chu a ni mai ang chu. Ringtute hi ringtu kan nih rual rualin Thlarau Thianghlimin min chenchilh nghal a. Chu Thlarau Thianghlim tanpuina chuan kan nuna Lalpa ropuina hi tilang tur kan ni. Ephesi 1:12-14-ah chuan Paulan heti hian a sawi a, "Keini Kristaa beiseina nghat hmasate hi a ropuina tilangtu tur kan ni. Amahah chuan thutak, in chhandamna Chanchin Tha chu, in lo hria a, Krista chu in ring ve ta a; tichuan Thlarau Thianghlim tiam chuan nangni pawh a chhinchhiah ta che u a ni" (lehlin thar) Ephesi vek bung 4:30-ah pawh, "Pathian Thlarau Thianghlim chu tilungngai suh u, tlanna ni atan ama ta ngei in nihzia Pathianin a chhinchhiahna che u a ni e," (lehlin thar) tih kan hmu bawk a. Hei hi II Korinth 1:21-22; 5:5-ah chuan 'zakhamna Thlarau' tiin Paulan min hrilh.

Chumi awmzia chu ringtu zawng zawngte hi Thlarau Thianghlima chhinchhiah kan ni a, chuvangin 'thlarau mi' vek kan ni. Thlarau Thianghlim chu kan nuna thuneihna kan chantir dana zir zelin kan Kristian nun chu a kal mai dawn a ni. Thlarau mi tih tawngkam kan hman dan hi thei rah tam leh tam lo kan sawi dan nen hian a inang khawp mai. Entir nan theihai kung pahnih a awm a, pakhat chu a rah teuh mai a, pakhat erawh chu tlem te chauh a rah a. An rah ve ve a ni; mahse a rah tlem zawk chu a neitute chuan,"Kumin chu kan theihai a rah lo," an ti ang. Ringtute hi 'thlarau mi' kan ni vek a; "thlarau mi tak' leh nun tam tak nei hi an awm hran leh chu a nih hi.

Rev.K.Lalhmingliana @ Dingdi