Kumtin Mai Insawi Thaih Mizo te vanduaina ni bera lang chu, Pathian hnen atanga thlarau thianghlim dawng inti ten kumtin mai Mipui min sawi thaih reng mai hi a ni lo maw? a tih theih awm e.

Kumin kum tawp dawnah Mission vengah hmeithai lar tak thah a ni a, Zarkawt tlangval bo, a hnua ruangchharin kum hlui leh thar kan hmuak tan chauh a, Republic vengah misual in chhungkaw khata mi 5 rawng takin a that leh a, tichuan Pathian thu nen, Thlaraumi inti ten Mizoram mipuite chu chhiatna thleng a, tuar mai tur awm ziazangin an zirtir ta tlauh tlauh a. Thim thuahnihna tiin, chhiatna rapthlak tak Mizoramin a hmachhawn dawn ni mai awm tak te in zirtirna maksak tak tak a lengvel reng bawk a. China ral lian tur hlau an lo awm thul, tunah North Vanlaiphai lamah Nausen hnute hnek ngai ang maia inngaiin, nausen rilru thianghlim put ngai ta tlata inhriatna rau nen a chenchilh a, chu chuan Zoram a dengchhuak rang em em a.

Tichuan Pathian hnen atanga hmuh niawm takin a tha lam hawi ni lo, a chhe lam hawi hlir maiin mipui zirtir reng kan ni a, kumtin mai Mizoram in chhiatna a tawk dawn tih chu kan insawi thaih dan a ni tlangpui ta a.

A la na deuh te chuan mahni In leh Lo hralhin, hmun him lan an pan thul. Zirtirna mak tak tak lengvel karah hian kan State thenawm te chuan a ni telin hmasawnna lam tluang an zawh a, hmuh theihin sorkar laipui tanpuina avangin hma an sawn zawt zawt a. Hetihlai hian Mizoram chu a hnungtawlh zawngin a thang emaw ni chu ! tih mai tur a ni.

Hetianga insawi thaih vak vak hian ram kal a siam mawh khawp mai a, kan thlaraumina te hi thlak ngam ila, he leilung hausakna haichhuak tur zawng hian taimakna, rinawmna, dikna rau hi chang zawk ila, tichuan khawvel ram dang hmasawn rual hian kan ram hian leirem a rap ve thei mai lawng maw?
-Dingdi Editorial Feb 3, 2015.