Home minister R Lalzirliana chuan, Tripura transit camp-a Bru-te lâk kîr hna thawh a nih leh hnua thla ruk chhunga Mizorama kîr lote chu Mizoram electoral roll atanga paih an nih tur thu a sawi.

January 30, 2015 khan New Delhi-ah Ministry of Home Affairs hotu te, Mizoram sorkar leh Tripura sorkara Home department hotute'n Tripura-a Mizoram Bru raltlante chungchang leh Mizorama lak let dan tur an sawiho a; MHA-a joint secretary Shambhu Singh-a'n a ho a, Mizoram sorkar aiawhin OSD (Home) David H Lalthangliana a tel.

New Delhi-a meeting chungchanga zawhna chhangin home minister R Lalzirliana chuan, meeting- ah hian Tripura transit camp- a Bru awmte chu Mizorama lak kîr leh an nih theih nan thla ruk hun pek a, chumi chhunga kîr duh lote chu Mizoram electoral roll atanga paih an remti niin a sawi.

Mizorama hruai kîr tum leh an nih hnua kîr duh lote awm zel dan tur chu anmahni thu a ni ang a, sorkar laipui pawhin ration a tihtawp bakah, camp a khâr tawh dawn niin a sawi bawk.

Home minister sawi danin, New Delhi-a meeting-ah hian Mizoram sorkar leh Tripura sorkarin Bru raltlante a enkawl dan chungchanga Supreme Court-in sawifiah tura a tih chu a chhanna tur siam fel a ni a; chhanna chu Supreme Court-ah an thehlut ang a, Supreme Court chuan February 27, 2015-ah a ngaihtuah (hearing) leh dawn a ni.

Bru raltlante chu March emaw, April emawah lâk kîr hna thawh theih a beiseiawm thu sawiin, R Lalzirliana chuan, "Tunah hian thil tul leh tihfel ngaite tifel turin sorkarin theihtawp a chhuah a, sum mamawh zat tur te, buhfai mamawh zat turte pawh sorkar laipuiah thlen a ni ang," a ti.

Home Minister sawi danin, Bru pawlte'n chhungkaw pakhat tana chhawmdawlna Rs. 1,50,000 leh kum hnih chhung a thlawna ration dawn an phût chu tihhlawhtlin vek a ni dawn lo a; MHA chuan chhungkaw pakhat tan Rs. 80,000 pek leh a thlawna kum hnih chhung ration pek a remti a ni. Mizorama an lêt hnuah a hlawma an awm khawm remtih a ni lo a, Mizoram an chhuahsan hmaa an khaw ngaiah theuh awm tura tih an ni.

R Lalzirliana chuan, kum 2005-a Intensive Electoral Roll atanga DC-te'n Tripura transit camp aṭanga Mizoram hruai kîr zat tura an chhût chu - Mamit district-ah chhungkaw 2,594, Kolasib-ah chhungkaw 628, Lunglei district-ah chhungkaw 233 an ni tih a sawi.
.