MNF president Zoramthanga, Myanmar sorkar leh hel pawlte inkara inremna a awm theih nana palai hna a thawh chungchangah Congress party chuan thuchhuah an siam a,
"BJP kaihhruai NDA sorkar nena inzawm nih leh NDA hman tangkai nih hi thil duhawm berah kan ngai lo," an ti.

MPCC thuchhuah chuan, BJP chu Hindu sakhaw behchhana din leh Hindu chawisan tum tlat niin an tarlang a, "Hneh taka 2013 MP inthlana an chak hnua NDA sorkar din a nih hnu rei lo têah BJP-in an mizia an rawn tilang ta," an ti a;
US president Barack Obama pawhin BJP chu sakhaw dang an nêkchêp hlauin, 'India rama sakhaw zalenna duhawm tak hi tichhe suh u,' ti lam hawiin thu a sawi niin an tarlang.

MPCC chuan, BJP sorkar chuan sakhaw dangte an nêkchêp mek zel thu leh India danpui pawh an palzut tan mek niin an sawi a, "Lang fiah em em chu - Hindu sakhua ni lo, sakhaw dang betute nêkchêp a, rahbeh a, nghaisak hi BJP kaihhruai NDA sorkar thil tum ber a ni," a ti.

MPCC chuan, BJP chu Kristiante nêkchêp tumah puhin, chuti chunga MNF-in NDA sorkara tel ve an nih thu zak hauh loa an tarlang thin chu an ngaihtuah chian loh vang niin an sawi a; BJP kaihhruai NDA sorkar chêt danah Kristiante an ngawi mai mai bik dawn lo tih an sawi bawk.
.