MNF president Zoramthanga chuan, Congress party chu India ram pumah an tlachhe tawh hle niin a sawi a, "Kum 2018 hian beih tham an awm ka ring hauh lo. Zoram mipui hian 'Candidate in dah kim ngam dawn em ni,' kan tih hial ka ring," a ti.

Zoramthanga hian nimin khan Mizo Hnam Runa inkhawmah thu a sawi a; Mizorama Congress sorkar chu sum lama tlakchhiatna vâwrtâwpin a tlakbuak nia sawiin, "Harsatna tinreng hnuaiah cheng tluklehdingawn nga chuang leibá an nei a, heng harsatna rapthlak tak hi mipuiin an hriat chian phawt loh chuan MNF tan sorkarna ken ngawt chi a ni lo," a ti a,

India rama inthlannaah Congress chu an tla zat zat zel niin a sawi. Myanmar rama remna palai hna a thawh chanchin sawiin, Zoramthanga chuan, Myanmar rama hel pawl hrang hrang 16-te chuan United Nationality Federal Council (UNFC) an din thu leh, sorkar leh hel pawlte'n inremna tluantling awm thei se an duh tak zet tih an lo hrilh tih a sawi.
MNF president chuan, Myanmar sorkar leh hel pawlte hnenah an tih tur emaw, tih loh tur emaw a hrilh lo a, MNF-te kum 20 chhung an rammut hnua India sorkar nen inremna an neih dante a hrilh tih a sawi a, "A tu lam ve ve pawhin pawm theih chin leh inhnuhhniam theih chin a awm a, pawm dun theih point awlsam atangin bul kan tan thu ka hrilh," a ti a; Mizoram inremna zir chiang tura remchang hmasaa lo kal an tum tih a sawi.

Zoramthanga chuan, Manipur- a Zo hnahthlak hnam pêng hrang hrang hel pawl hruaitute nen New Delhi-ah an inkawm tih sawiin, India leh Manipur sorkar nena remna kawnga an inbiak theih dan turte an sawi niin an sawi a; Manipur-a hel pawlte nena an inbiakna chungchang chu India sorkar thuneitute hnenah a thlen nghal tih a sawi bawk.
.